2011 жылы Оңтүстік Қазақстан облысы бойынша Кедендік бақылау департаментінің «Мақтарал» кеден бекеті ел қазынасына 850 миллионнан астам теңге өндірген. Осылайша, өткен жылға қойылған тапсырма 102 пайызға орындалды. Еліміздің Кеден Одағына кіруіне байланысты көршілес Өзбекстан мемлекетімен арадағы шекара қызметі күшейтілді. Нәтижесінде, осы кеден органы қызметкерлерінің қырағылығының арқасында 5 қылмыстық іс қозғалып, есірткі және экономикалық контрабанданың жолы кесілді. Әкімшілік құқықбұзушылықтардың саны 133-ге жетіп, 1 млн 876 мың 392 теңге айыппұл салынды. Кеден бекетінде анықталған экономикалық контрабанда және әкімшілік құқықбұзушылық тауарларының сот арқылы тәркіленгеннен түскен құны 5 млн 756 мың 845 теңгені құрады. Бүгінгі таңда есірткі бизнесімен күресті күшейту мақсатында аймақтағы кеден бекеттері жоғары технологиялық қондырғылармен жабдықталуда. «Осы 2012 жылы жаңадан орнатылып жатқан қондырғылардың көмегімен есірткі саудасымен күрес өзінің оң нәтижесін береді деп ойлаймыз» - дейді кеден бекетінің қызметкерлері. Кеден Одағы мен Халықаралық кеден ұйымының стандарттарына сәйкес, бақылап-өткізу пункттерін жабдықтау мақсатында мемлекеттік шекараны кеден бекеттерінің қызметін жетілдіру бағытындағы кешенді жұмыстар жүргізілуде. Ендігі мақсат – қолданысқа берілген барлық инфрақұрылымдар мен техникалық құрылғыларды сапалы қызмет атқаруда тиімді пайдалану болып табылады.
